الحق عالقتيل .. والقاتل ذنبه مغفور
كتب محمد جابر:
معقول يا قتيل، ولك شو هالعملة اللي بتعملها، كيف بتظلم القاتل وبتخليه يقتلك، ليش عملت هيك يا قتيل انت السبب بكل شي.
اما القاتل، هيدا الطيب من حقه يقتل وهوي دائما على حق كونه محمي بشريعة الغاب ومرضى عنه من حاكم البشرية.
يا قتيل ما بقى تحكي بالقيم والعدل ومكافحة الظلم، نصيحة بلهن واشرب ميتهن، وما حدا رح يسأل عنك يا حبيبي اذا ما عندك قوة تستند عليها، ولو عندك قوة يا قتيل ما كنت صرت قتيل.
هيدا هوي عالمنا يا قتيل، الحق صار باطل والباطل صار حق، ما بقى تحكيني ب الليسترين، ما إلك الا الله والأمم المتحدة يا قتيل، مع كل دعوة بترفعها بتربح شوية قلق من الامين العام المدعو غوتيريش.
بعرف يا قتيل بدك تستغرب، وانا متلك مستغرب، وأطفال غزة اللي استشهدوا مستغربين, نحنا المستغربين صرنا الاكترية يا قتيل ، ومش رح يتغير الزمن، رح يبقى الحق عالقتيل والقاتل ذنبه مغفور لانه الاقوى.
